:: ദുർബല ഹദീസുകൾ :: 4
1

നബി പറഞ്ഞതായി റിപ്പോർട്ട്‌ ചെയ്യപ്പെടുന്ന മറ്റൊരു ഹദീസ് ഇപ്രകാരമാണ്

ജരീർ (റ) വിൽ നിന്ന് നിവേദനം: നബി (സ) പറഞ്ഞു :"റമദ്വാൻ മാസം  ആകാശത്തിനും ഭൂമിക്കും ഇടയിൽ തങ്ങിനിൽക്കും. ഫിത്ർ സക്കാത്ത് കൊണ്ട് മാത്രമേ അത് അല്ലാഹുവിങ്കലേക്ക്‌ ഉയർന്ന് പോവുകയുള്ളൂ." (ഇമാം മുന്ദിരി യുടെ 'അത്തർഗീബ്'  2 / 151-152, ഇമാം സൂയൂത്തിയുടെ 'അൽ ജാമി ഉസ്സഗീർ')

മുഹമ്മദ്‌  ബിൻ ഉബൈദ് അൽ ബസരീ എന്ന റാവി (മജ്ഹൂൽ) അജ്ഞാതനായതിനാൽ  ഈ ഹദീസ് ദുർബലമാണ്. (സിൽസിലത്തുൽ അഹദീസ് ളഈഫ: ന: 43)          

2

നബി (സ) പറഞ്ഞതായി പറയപെടുന്ന മറ്റൊരു റിപ്പോർട്ട്‌ ഇപ്രകാരമാണ് "നോമ്പ് അനുഷ്ടിക്കൂ, നിങ്ങൾ ആരോഗ്യവാനായി തീരും" (ത്വബറാനി - അൽ ഔസത്ത് , അത് തിബ്ബൽ നബവി - അബു നുഐം, പേ:113, ഫിർദൗസ് അൽ അഖ്‌ബാർ:ന: 3560)

അൽപം ദൈർഘ്യമുള്ള മറ്റൊരു ഹദീസിൻറെ ഭാഗമായും ഇത് വന്നിട്ടുണ്ട്. അത് ഇപ്രകാരമാണ്: "...യുദ്ധത്തിനു പോവുക നിങ്ങൾക്ക് യുദ്ധ മുതലുകൾ ലഭിക്കും,നോമ്പ് അനുഷ്ടിക്കുക, നിങ്ങൾ ആരോഗ്യവാനാകും, യാത്ര ചെയ്യുക നിങ്ങൾ സ്വയം പര്യപ്തനാകും.." (മുഅ'ജം അൽ ഔസത്ത് : 8312)

ഈ ഹദീസും ദുർബലമായതാണ്.

ഈ ഹദീസിൻറെ പരമ്പര ദുർബലമായതാണെന്ന്  ഹാഫിസ് അൽ ഇറാഖി , 'തഖ്‌രീജ് അൽ ഇഹ്യാ' 3/85 ൽ പറയുന്നു.

(ഈ ഹദീസിൻറെ പരമ്പര ഇപ്രകാരമാണ്.  

സുഹൈൽ ബിൻ അബുസാലിഹിൽ   നിന്ന് സുഹൈർ ബിൻ മുഹമ്മദ് അദ്ദേഹത്തിൽ നിന്ന് മുഹമ്മദ് ബിൻ സുലൈമാൻ)

ഈ ഹദീസ് ഉദ്ധരിച്ച ശേഷം ഇമാം ത്വബ്റാനി തന്നെ മുഅ'ജം അൽ ഔസത്തിൽ പറയുന്നു: "സുഹൈർ ബിൻ മുഹമ്മദ്‌ അല്ലാതെ മറ്റാരും തന്നെ  സുഹൈൽ ഇൽ നിന്നും ഹദീസിൽ ഈ വാക്കുകൾ ഉദ്ധരിക്കുന്നില്ല."  

സുഹൈർ ബിൻ മുഹമ്മദിൽ നിന്നും ഈ ഹദീസ് ഉദ്ധരിക്കുന്നത് ശാമുകാരനായ മുഹമ്മദ്‌ ബിൻ സുലൈമാൻ ആണ്. 

ഇമാം ബുഖാരി പറയുന്നു: "സുഹൈറിൽ നിന്നും ശാമുകാർ എന്തെങ്കിലും റിപ്പോർട്ട്‌ ചെയ്തിട്ടുണ്ടെങ്കിൽ അത് ദുർബലമാണ്. ഏതെങ്കിലും ബസ്വറ (ഇറാഖ്)ക്കാരൻ അദ്ദേഹത്തിൽ നിന്നും റിപ്പോർട്ട്‌ ചെയ്തിട്ടുണ്ടെങ്കിൽ അത് സ്വഹീഹ് ആണ്."

ഇമാം അഹമ്മദ് ബിൻ ഹമ്പൽ (റ) പറയുന്നു:"ശാമുകാരായ നിവേദകരിലൂടെയുള്ള സുഹൈറിൻറെ റിപ്പോർട്ടുകൾ ദുർബലമാണ്."

അബൂ ഹാത്തിം പറയുന്നു:"ശാമിൽ വെച്ച് സുഹൈർ തൻറെ ഓർമ്മയിൽ നിന്നാണ് റിപ്പോർട്ട്‌ (ഹദീസുകൾ) ചെയ്തത്. (പുസ്തകം വായിച്ചു കൊടുത്തതല്ല) അങ്ങിനെ ധാരാളം പിഴവുകൾ വരുത്തി."    (ഇബ്നു ഹജർ അസ്ഖലാനി - 'തഹ്ദീബ് അൽ തഹ്ദീബ്' 3/349)

ഇമാം മുന്ദിരിയും ഇമാം ഹൈത്തമിയും പറയുന്നു:"ഈ ഹദീസിൻറെ നിവേദകർ തീർത്തും (തിഖത്ത്) അവിശ്വസ്ഥരാണ്. അതിൽ സുഹൈർ ബിൻ മുഹമ്മദ്‌ ഉൾപ്പെടുന്നു." (അൽ തർഗീബ് വൽ തർഹീബ് 2/38, മജ്മൂ അൽ സവാഇദ്  3/179) 

ദുർബല  ഹദീസുകൾ -3

നബി (സ) പറയുന്നതായി ഉദ്ധരിക്കപെടുന്ന സുദീർഘമായ ഒരു ഹദീസിൽ ഇപ്രകാരം കാണാം

"അല്ലയോ ജനങ്ങളെ, നിങ്ങൾക്കിതാ മഹത്തായൊരു മാസം സമാഗതമായിരിക്കുന്നു. ആ മാസത്തിൽ ആയിരം മാസത്തേക്കാൾ പുണ്യകരമായ ഒരു രാത്രി ഉണ്ട്. ആ മാസത്തിൻറെ പകലുകളിൽ നോമ്പെടുക്കൽ അല്ലാഹു നിർബന്ധമാക്കുകയും രാത്രിയിൽ നിന്ന് പ്രാർത്ഥിക്കൽ (നമസ്ക്കാരം) പുണ്യകരമാക്കുകയും ചെയ്തിരിക്കുന്നു. ആ മാസത്തിൽ സുന്നത്തായ ഏതെങ്കിലും പുണ്യം ചെയ്ത് അല്ലാഹുവിനോട് അടുക്കാൻ ആരെങ്കിലും ശ്രമിച്ചാൽ മറ്റ് മാസങ്ങളിൽ ഒരു നിർബന്ധകർമ്മം പ്രവൃത്തിച്ചവനെ പോലെയായിരിക്കും. ഒരു നിർബന്ധ കർമ്മം ചെയ്യുന്നവൻ മറ്റ് ദിവസങ്ങളിൽ എഴുപത് നിർബന്ധ കർമ്മങ്ങൾ പ്രവൃത്തിച്ചവനെ പോലെയുമായിരിക്കും . . . . . . . . . .  . . .  അതിൻറെ ആദ്യഭാഗം അനുഗ്രഹവും മധ്യഭാഗം പാപമോചനവും അവസാനം നരക മോചനവുമാകുന്നു. "

ഈ ഹദീസ് അലീയ്യുബിനു സൈദുബിനു ജദ്ആനിലൂടെ സഈദ് ബിനുൽ മുസയ്യബിൽ നിന്നും അദ്ദേഹം സൽമാനുൽ ഫാരിസിയിൽ നിന്നും നിവേദനം ചെയ്യുന്നതായി ഇമാം ഇബിനു ഖുസൈമയും(ന:1887) ഇസ്ബഹാനി തൻറെ അത്തർഗീബിലും(178) ഉദ്ധരിച്ചിട്ടുണ്ട്.

സൽമാനുൽ ഫാരിസി (റ) വില നിന്ന് സഈദ് ബിനുൽ മുസയ്യബ് ഒരു ഹദീസും കേട്ടിട്ടില്ല. അതുകൊണ്ട് തന്നെ ഇതിൻറെ പരമ്പര മുറിഞ്ഞതാണ്. കൂടാതെ, ഈ ഹദീസിൻറെ പരമ്പരയിൽ വരുന്ന "അലീയ്യുബിനു സൈദുബിനു ജദ്ആൻ" ദുർബലനാണ്. അതുകൊണ്ട് ഈ ഹദീസ് ദുർബലമായതാണ്.

ഇയാളെ പറ്റി ഇബിനു സഅദ് പറയുന്നു:

"ഈ റാവിയിൽ (അലീയ്യുബിനു സൈദ്) ദുർബലതയുണ്ട്. ഇയാളെ തെളിവിന്‌ കൊള്ളില്ല."

ഇമാം അഹമ്മദ് ബിൻ ഹമ്പൽ (റ) പറയുന്നു:

"ഇയാൾ ഖവിയ്യ്(ബലവാൻ) അല്ല."

ഇബിനു മഈൻ പറയുന്നു :

"ഇയാൾ ദുർബലനാണ്."

ഇബിനു അബീ ഖൈതമ പറയുന്നു:

"എല്ലാ കാര്യത്തിലും ഇയാൾ ദുർബലനാണ്."

ഇത് ഉദ്ധരിക്കുന്ന ഇബിനു ഖുസൈമ തന്നെ പറയുന്നു:

"അയാളുടെ ഓർമ്മപ്പിശക് കാരണം ഞാൻ അയാളെ തെളിവിനായി സ്വീകരിക്കാറില്ല."

(റഫ:  തഹ്ദീബു ത്തഹ്ദീബ് 7/322-323)  

ഇമാം സൂയൂത്തി, ഇബിനു ഹജറിൽ നിന്നും ഇപ്രകാരം ഉദ്ധരിക്കുന്നു "ഈ ഹദീസിൻറെ അവലംബം അലിയ്യുബിനു സൈദാണ്‌. അയാളാണെങ്കിൽ ദുർബലനും." (ജംഉൽ ജാവാമിഅ" : 23714)

ഈ ഹദീസ് ഉദ്ധരിച്ച ശേഷം ഇമാം ഇബിനു ഖുസൈമ തന്നെ പറയുന്നത് "ഹദീസ് ശരിയായാൽ" എന്നാണ്.       

ഷെയ്ഖ്‌ അൽബാനിയും തൻറെ സിൽസിലത്ത് ളഈഫയിൽ ഈ ഹദീസ് തള്ളപ്പെടുന്ന താണെന്ന് (മുൻകർ) പറയുന്നു. ( 2/262. ന. 871)    

:: ദുർബല ഹദീസുകൾ :: 2

"എൻറെ സമുദായത്തിൻറെ ആയുസ്സ് 1500 വർഷം കടക്കുകയില്ല" എന്ന ഹദീസ് ഇമാം സൂയൂത്തി അൽ ഹാവി ലി ഫതാവി 2/248 ലും, തഫ്സീർ റൂഹുൽ ബയാൻ 4/262, ഇമാം അഹമ്മദ് , കിതാബുൽ ഇലൽ പേ: 89 ലും ഉദ്ധരിച്ചിട്ടുണ്ട്. എന്നാൽ ഈ ഹദീസ് ഖുർആനിനും വ്യക്തമായ ബുദ്ധിക്കും എതിരാണ്. ചില ഇസ്രായീലി കഥകളാണ് ഈ റിപ്പോർട്ടുകൾക്ക് ആധാരം.

1) അല്ലാഹു പറയുന്നു;
"ജനങ്ങൾ അന്ത്യസമയത്തെപ്പറ്റി നിന്നോട് ചോദിക്കുന്നു. പറയുക: അതിനെപ്പറ്റിയുള്ള അറിവ് അല്ലാഹുവിങ്കൻ മാത്രമാകുന്നു. നിനക്ക് (അതിനെപ്പറ്റി) അറിവുനൽകുന്ന എന്തൊന്നാണുള്ളത്? അന്ത്യസമയം ഒരു വേള സമീപസ്ഥമായിരിക്കാം." (ഖു൪ആൻ അദ്ധ്യായം 33 അഹ്സാബ്)

2) സ്വഹീഹായ ഹദീസിലൂടെ നബി (സ) നമ്മെ പഠിപ്പിക്കുന്നു:
ഉമർ (റ) വിൽ നിന്ന് മുസ്ലിം റിപ്പോർട്ട് ചെയ്യുന്ന ഒരു ഹദീസിൽ, ജിബ്രീൽ (അ) മനുഷ്യ രൂപത്തിൽ നബി (സ) യുടെ അരികിൽ വരികയും ഇസ്ലാം , ഈമാൻ , ഇഹ്സാൻ എന്നിവയെ പറ്റി നബിയോട് ചോദിക്കുകയും ചെയ്യുന്നതായി കാണാം തുടർന്ന് ജിബ്രീൽ (അ) ചോദിക്കു ന്ന ഭാഗം നോക്കുക:
"അയാൾ (മനുഷ്യ രൂപത്തിൽ വന്ന ജിബ്രീൽ -അ-) പറഞ്ഞു: എന്നാൽ അന്ത്യ സമയത്തെ (ലോകാവസാനത്തെ) സംബന്ധിച്ച് താങ്കൾ എനിക്ക് പറഞ്ഞു തന്നാലും: റസൂൽ (സ) പറഞ്ഞു : ആ വിഷയത്തെക്കുറിച്ച് ചോദിക്കപ്പെട്ടവൻ ചോദ്യ കർത്താവിനെക്കാൾ അറിവുള്ളവനല്ല. അയാൾ പറഞ്ഞു: എന്നാൽ അതിൻറെ ലക്ഷണങ്ങളെ കുറിച്ച് താങ്കൾ എനിക്ക് പറഞ്ഞു തന്നാലും...."

അപ്പോൾ ലോകാവസാനം കൃത്യമായി പറയുന്ന ഹദീസുകൾ ഖുർആനിൻറെയും സ്വഹീഹായ ഹദീസുകളുടെയും അടിസ്ഥാനത്തിൽ ദുർബലമാണെന്ന് നമുക്ക് എളുപ്പത്തിൽ തന്നെ മനസ്സിലാക്കാം.

മനുഷ്യ വംശത്തിൻറെ ആയുസ്സ് 7000 വർഷങ്ങളാണ്എന്ന ഹദീസും നബി (സ) യ്ക്ക് ശേഷം 200 വർഷങ്ങൾക്ക് ശേഷം ലോകാവസാനത്തിൻറെ ലക്ഷണങ്ങൾ പ്രത്യക്ഷപ്പെടും എന്ന ഹദീസും സുവ്യക്തമായ ബുദ്ധിക്കും യുക്തിക്കും നിരക്കാത്തതിനാൽ പണ്ഡിതന്മാൽ തള്ളിക്കളഞ്ഞ ഹദീസുകളാണ്.
മേൽ പറഞ്ഞ ഹദീസുക ളുടെ ആശയം ഖുർആനിന് എതിരാണ് എന്ന് ഒന്നുകൂടി തെളിയിക്കുന്ന ആയത്ത് കാണുക:

"അവ൪ പറയുന്നു: എപ്പോഴാണ് ഈ വാഗ്ദാനം ( പുലരുന്നത്? ) നിങ്ങൾ സത്യവാൻമാരാണെങ്കിൽ ( അതൊന്ന് പറഞ്ഞുതരൂ )
പറയുക: ആ അറിവ് അല്ലാഹുവിൻറെ പക്കൽ മാത്രമാകുന്നു. ഞാൻ വ്യക്തമായ താക്കീതുകാരൻ മാത്രമാകുന്നു." (ഖുർആൻ 67 മുൽക്ക്: 25-26 )

ഇമാം ഇബിനുൽ ഖയ്യിം തൻറെ "അൽ മനാറുൽ മുനീഫ് " (വാല്യം 1, പേ: 80)ലെ  ഹദീസ് മനുഷ്യനിർമ്മിതമാണെന്ന് പറയുന്നു. തുടർന്ന് പറയുന്നതിൻറെ ചുരുക്കം ഇതാണ് :

'7000 വർഷം മനുഷ്യ വംശം ഉണ്ടാവുകയുള്ളൂ എന്ന് പറയുകയും നബിക്ക് ശേഷം 1500 വർഷം ഉള്ളൂ എന്ന് പറയുകയും ചെയ്താൽ ഇനി വെറും 251 വർഷം മാത്രമേ അവശേഷിക്കുന്നുള്ളൂ എന്ന് (ഇബിനു ഖയ്യിം അന്ന് എഴുതിയതാണ്) കൃത്യമായി പറയുവാൻ കഴിയും. അത് ഖുർആനിനു എതിരാണ്.'

ഇമാം ഇബിനു കസീർ "അൽ നിഹായ ഫിൽ ഫിതൻ ..."(1/25) ൽ പറയുന്നു: "അന്ത്യ സമയം പ്രവാചകൻ നിർണയിച്ചു പറഞ്ഞ ഒരൊറ്റ (സ്വഹീഹായ) ഹദീസ്പൊലുമില്ല., അതിനെ പറ്റിയുള്ള ചില സൂചനകളും ലക്ഷണങ്ങളും അല്ലാതെ."  


ഇമാം ശൗക്കാനി "അൽ മുഖാസിദ് അൽ ഹസന" (പേ: 444)ൽ പറയുന്നു : "ലോകാവസാന സമയം കൃത്യമായി പറയുന്ന ഉദ്ധരിക്കപെട്ട എല്ലാ വിവരണങ്ങളും അടിസ്ഥാന രഹിതമായതോ, സനദ് (സ്വഹീഹ് ആണെന്ന്) തെളിയിക്കപ്പെടാത്തതോ ആണ്."

:: ദുർബല ഹദീസുകൾ :: 1


ഇബിനു അബ്ബാസിൽ നിന്ന് നിവേദനം: റസൂൽ (സ) പറഞ്ഞു ; "മൂന്നു കാര്യങ്ങൾ കാരണം നിങ്ങൾ അറബിയെ സ്നേഹിക്കുക, എന്തുകൊണ്ടെന്നാൽ, ഞാൻ ഒരു അറബിയാണ്, ഖുർആൻ അറബി ഭാഷയിലാണ്, സ്വര്ഗ്ഗത്തിലെ ഭാഷ അറബിയാണ്."

ഇതു ഉദ്ധരിച്ചിരിക്കുന്നത്
1. മുസ്തദ്റഖ്: ഇമാം ഹാക്കിം 4/87
2.അൽ മുഅ'ജംഉൽ കബീർ  11441
3.ശുഅബുൽ ഈമാൻ 1364
 
വളരെയധികം  ദുർബലമായ ഹദീസ് ആണിത്.

ഇതു മനുഷ്യ നിർമ്മിതമായ കൃത്രിമ ഹദീസ് ആണെന്ന് ഇമാം ഇബിനു ജവ്സി പറയുന്നു.

ഇമാം ദഹബി പറയുന്നു : "ഇത് മവ്ളൂഅ" (മനുഷ്യ നിർമ്മിത കൃത്രിമ ഹദീസ്) ആണെന്നാണ് എനിക്ക് തോന്നുന്നത്."

അൽബാനി ഈ ഹദീസ് ല്വഈഫ് ആണെന്ന് പറയുന്നു. (സിൽസിലതു ലഈഫ 160)